Amores Prohibidos 2.0 é unha obra de teatro participativa e interactiva, adaptada a internet, que usa como escenario tanto localizacións reais como as redes sociais e Redenasa.tv, unha plataforma de creación e difusión cultural creada por Chévere. Os personaxes comunícanse entre eles mediante vídeos, fotos, chats, audios e mensaxes que comparten a través das súas contas nas redes sociais, converténdose nun diálogo aberto á interacción do público. Amores Prohibidos 2.0 é un proxecto innovador no eido escénico español co que se quere incrementar o acceso e a disponibilidade de contidos culturais en galego en internet.

AP-2.0 é unha versión de Romeo e Xulieta, o clásico de William Shakespeare sobre o amor, o odio e a reconciliación. Nós adaptamos a historia ao tempo e ao lugar no que vivimos: Xulieta e Romero son alumnos dun instituto dunha vila galega no ano 2012. E o enfrontamento entre Montescos e Capuletos sirve para achegarse ao conflito lingüístico creado polo goberno galego entre os que defenden e os que atacan o dereito a usar a lingua galega. A acción trascorre ao longo de cinco días, que é a duración da historia orixinal de Shakespeare, contando todos os acontecementos en tempo real. Reducimos os personaxes aos seis principais para facilitar o seguemento a través das redes sociais e incorporamos a figura de Xespir como moderador, asumindo funcións de community manager.

En AP-2.0 experimentamos con prácticas de creación abertas e colaborativas. Apostamos por crear un equipo de traballo amplo no que participou voluntariamente un grupo de 24 adolescentes de entre 13 e 16 anos, xunto a un grupo de profesionais do teatro, do xornalismo e das redes sociais, o profesorado do IES A Cachada de Boiro e algúns pais e nais. Entre todas e todos fómoslle dando forma a esta historia, creamos os personaxes, debatemos sobre os conflitos de fondo, escollemos localizacións, repartimos papeis, tarefas e responsabilidades. E fixemos público todo o proceso a través do blog http://redenasa.tv/gl/amores-prohibidos/, das redes sociais e da propia plataforma Redenasa.tv.

O noso agradecemento á ANPA do IES A Cachada de Boiro e ao profesorado que facilitou e colaborou no proxecto: Fernando Blanco, Cristina Blanco, María Constantino, Silvia García, Ana Moreiras, Berta Gómez, José Manuel Hermida, Pilar Hermo, Joaquín Morales, Mariano Muñiz, Carme Robledo, Mª Carmen Rodríguez