Cacheiras Nadal Comedy foi a parte final e máis visible dun proxecto máis amplo de teatro comunitario, realizado en 2013 e 2014 en colaboración cun grupo de comerciantes e veciños de Cacheiras (Teo) e que titulamos xenéricamente Cacheiras Comercio Creativo. A idea é utilizar o teatro e a creatividade como factores para a motivación das persoas que traballan no comercio de proximidade do concello de Teo, ofrecendo ademais unha imaxe innovadora e lúdica da zona de Cacheiras e visibilizando a súa actividade comercial. Para iso abrimos un proceso de traballo colaborativo para a creación dunha serie de pezas “teatrais” que se exhibiron dentro dos mesmos comercios. Cada peza tratou un tema proposto polas persoas participantes, a partir de historias que expresan as súas experiencias, traxectorias, vivencias, problemas, anécdotas, intereses e preocupacións, que moitas veces son comúns. Foron seis sesións de traballo onde se expresaron e debateron temáticas, formatos e estratexias e unha práctica teatral que serviu para traballar coa voz, coa presenza no escenario ou o xeito de expresarse en público, e para guionizar ideas, teatralizar situacións e incorporar a creatividade aos labores diarios. Despois xa foron ensaios, lecturas, gravacións...

Cacheiras Nadal Comedy foi o resultado visible do proceso, un evento parateatral que veu reforzar a campaña de Nadal dos comercios participantes. Durante dous días o público que se achegou a Cacheiras puido visitar os comercios e asistir ás intervencións escénicas realizadas de maneira colaborativa entre comerciantes e artistas compartindo escenario e con formatos que foron do stand up ao teatro de obxectos, pasando pola performarce, a entrevista, o musical e o cinema. Un xeito de poñerlle cara ao comercio e coñecer ás persoas que están do outro lado do mostrador ou da mesa. Un convite a usar o comercio que temos máis perto e a mudar os nosos itinerarios habituais como consumidoras.

Esta proposta xurdiu do interese manifestado por algúns comerciantes da zona de Cacheiras para usar o teatro como vehículo de dinamización da zona e de motivación dos profesionais do comercio local. E contou co apoio da concellaría de cultura do Concello de Teo, formando parte das actividades incluídas no plan de residencia teatral de Chévere.