O proxecto completo de Citizen componse de tres espectáculos autónomos de pequeno e mediano formato, que se foron facendo e estreando na Sala Nasa de Santiago de Compostela ao longo da tempada 2010-2011, coma se se tratase dunha obra de teatro por episodios. Cada un deles foi a continuación e a consecuencia do anterior. E ao final, a suma dos tres supuxo un novo espectáculo de case catro horas de duración que se estreou en marzo de 2011.

A obra, ao completo ou por partes, estivo xirando por España ata finais de 2013, superando as 120 representacións e os 10.000 espectadores, e no 2015 fixo unha xira por distintas cidades de Uruguai e Arxentina. Ademáis, acadou un importante recoñecemento crítico e profesional: foi a obra máis votada entre 150 propostas para acceder á Red de Teatros Alternativos de España, presentouse en festivais internacionais como Temporada Alta (Cataluña) e Escena Contemporánea (Madrid), recibiu o Premio da Crítica 2011 e 5 premios María Casares en 2012 (entre eles mellor espectáculo, mellor dirección, mellor actriz protagonista).